Details

Latitude

25.234

Longitude

96.9165

Start Date

2019-05-15

End Date

2019-05-15

Transcription (La Ring) Ndai Nam Lim buga hpung ngu ai hte seng nna gaw Nam Lim buga hpung ngu ai gaw shawng e gaw Lahkum buga Lahkum ga she nga ma ai Lahkum hpung she nga ma ai. Ndai Lahkum hpung ndai nga wa na ngu ai ndai mung htaw ra Bang Htan buga hpung shawng shawng na mying gaw Ugaw bum hpung nga ma ai. Ugaw bum hpung kaw gaw Sara Kyin Sara sasana Sara Ta Dwin ngu ai wa Ugaw bum hpung hpe wa yu nga ai hpung sara tai nga ai ten hta e wo ra hkan gaw hpung masha mung law wa sai re rai ndai Loi Yawng Nmaw kawng Loi Lung ndai maga de wo ra Maji Gung kaji kaw nna Nya Me hka rap nna Nmaw Kawng Loi Yawng Loi Lung dai hku sa wa ai. Loi Lung kaw nna e Dau Ze Hkang dingla ngu ai hkinjawng dumsa jaiwa kaba Dau Ze Hkang dingla ngu ai hpe e Sara Ta Dwin yan Sara Hpauwung Yaw ngu ai Ugaw bum hpung kaw na sa wa ai hte Dau Ze Hkang dingla hpe e sa jahta sa shachyen sa shaga la rai nna nat jaw kaw na hpung gale wa na matu sa tsun matsun ai shaloi Dau Ze Hkang dingla hkap la nna nat kau da ya sai. Dai shani kaw nna Dau Ze Hkang gaw shi gaw dumsa hkringwa jaiwa kaba re ai hte maren shi gaw nat kau sai re majaw shi a makau de nga ai shi a manaw mang jinghku jingyu ni nat jaw htung lai hkan nga ai ma hkra gaw "Anhte a Sara wa pyi anhte a dumsa wa pyi nat kau sai gaw anhte mung kau saga" nga nna Loi Lung hkan na Loi Yang Nmaw kawng hkan na ni mung nat kau shajang mat wa ai rai na hpung masha law mat wa ai. Dai Nmaw Kawng Loi Yawng Loi Yung ngu gaw Lahkum ga rai nga ai re majaw gaw ndai gaw hpung htinggaw mung law wa re ai shaloi "Nanhte bum ga e sha nga yang gaw nmanu ai laika hpaji mung sharin la ra na rai sai, le hkawm sa hkawm wa loi ai de le ra Magyeng mare baw le ra hkan e shara jahkrat nna nga wa na matu mai sai" ngu nna Sara Ta Dwin yan Sara Hpauwung Yaw dai hku matsun madun da ai majaw Loi Yung hkan na ni Loi Yawng Nmaw kawng hkan na ni dai Magyeng mare lahta e deng mi daram hkan tsan ai kaw e Hkamut hka kau kaw e htingra sa hkyen rai na dai kaw e masha nga hpang wa ai. Jawngma kanu kawa ni mung nga wa jawng mung bai hpaw wa rai na dai kaw Hkamut jawng ngu ai laika sharin jawng mung nga hpang wa re ai hpang gaw angwi angwi angwi sha Nam Lim hkran de mung masha mung nga wa Magyeng hkran de mung nga wa rai hpang angwi sha wo ra bum ga layang ga ndai Lahkum ga ngu ai hkan na ni yawng gaw hpung masha tai mat wa ai law mat wa jang Lahkum hpung ngu ai mung rai wa ai. Lahkum hpung ngu ai ndai hpe ya lai wa sai kade nna ai aten kaw nna shaning sumshi ning mali shi ning ndai daram kaw na gaw Nam Lim hpung ngu nna shamying ai hpe Nam Lim buga hpung ngu nna daini shamying mat wa ai rai sai. Dai daram sha tsun lu ai law.

Sources