Details

Latitude

25.234

Longitude

96.9165

Start Date

2019-02-05

End Date

2019-02-05

Transcription (La Ring) Gabaw gaw shu sha hte jahkrai ma a lam re. Moi shawng de jahkrai ma langai mi gaw kanu kawa nnga mat nhtawm lu su sahte ni kaw nga rem chyang ai. Dai shaloi lani mi na hta shi gaw nga sa rem ai shaloi shi na shat hpawda tawn da ai makau yang kaw shu sha langai mi gaw sa nga nga ai. Dai shaloi jahkrai ma gaw shat sha ai shaloi shu sha hpe mung "Sha u sha u" ngu na shat jaw sha ai. Dai shaloi shu mung dai jahkrai ma jaw sha ai shat hpe sha ai. Dan rai na hpang shani bai jahkrai ma gaw nga bai sa rem ai. Dai shaloi mung shu sha dai shara kaw sha bai sa nga na jahkrai ma gaw shi shat sha ai shaloi shat bai jaw sha ai. Ding rai na shu sha gaw kaba wa sai. Dai shaloi jahkrai ma gaw shu sha hpe bai jaw sha ai shaloi nsha ai. "Shu sha sha u le sha u" nga tsun tim shu sha gaw "Ngai nsha sana shat ndai hpe nang ngai hpe ndai ram kaba hkra bau da ai majaw chyeju dum sai. Ngai mung ngai hkrai tam sha sana. Nang mung nta galaw na nga mat sanu. Nang mung nga hkum rem chyang sa" nga ai. Dai shaloi jahkrai ma gaw shi shu manang ga chye shaga wa ai hpe manu mana kabu nhtawm shi na lu su sahte ni hpe wa tsun dan ai. Dum nta galaw na nga mat u nga tsun ai. Dai shaloi shi na shu manang hpe shi na lu su sahte ni gaw "Hpawtni na na manang hpe woi wa rit" nga. Dai shaloi shu gaw shu hpe jahkrai ma gaw "Ngai nja la ai shu sha e ngai nga ai nta de wa ga" nga tsun ai. Dai shaloi shu gaw "Nkam ai nkam ai nye na nu hpe pyi nyau sha kau ya ai ngai hpe bai nyau sha kau na ra ai" nga ai. Dai shaloi jahkrai ma gaw nwoi wa ai sha shi hkrai nta de wa mat nu ai. Dai shaloi nta du shaloi shi na lu su sahte nta madu ni gaw "Na na manang shu hpe woi wa nni" nga san ai. Dai shaloi jahkrai ma gaw tsun ai "Shu hpe e shi wa jang e nyau sha kau na ra ai shi nu hpe pyi nyau sha kau ai da" nga. Dan nga bai tsun dan ai "Shu hpe hpawtni na woi wa rit nyau hpe rawng kau sai ngu tsun dan u" ngu. Hpang shani gaw shu hpe woi wa ai. Shu mung dai nta du ai hte gara kaw nga mat ai re nchye jahkrai ma shat sha yang sha shat sha lawm lawm re ai. "Jahkrai ma e nang mung nta galaw na nga mat sanu" nga ai. Dai hpe shi na lu su sahte ni hpe e tsun dan ai. Dai shaloi lu su sahte ni mung "Nmai na re" nga tsun ai. Dai shaloi dai jahkrai ma mung lu su sahte ni kaw lahkawng ni dang nchyang bai kahtap chyang ai. Dai hpang e gaw jahkrai ma mung kaba wa nhtawm shi dum nta shachyaw la nna nga mat ai. Dai shi na shu manang hte naw nga yang shi shu manang wa tsun da ai "Sinpraw maga de sa wa yang wa kanu hkan nu ni nga ai dai kaw sa htu yu u" nga. Sinna maga de sa wa yang dai kaw lauze hkan nu ni nga ai dai kaw sa htu yu u, ding dung maga de sa wa yang dai kaw gumra hkan nu ni nga na ra ai dai kaw sa htu yu u" nga. "Ding da maga de sa wa yang bainam hkan nu ni nga nga na ra ai dai kaw sa htu yu u" nga jang dai tsun da ai hte maren jahkrai ma mung shi dum nta shachyaw la nna nga ai shaloi dai shi sinpraw maga de sa wa yang wa kanu hkan nu ni nga ai. Shi sa wa ai shaloi nnga mat ai. Dai shara kaw htu yu yang ja tawng rawng nga. Hpang lauze hkan nu ni nga ai shara kaw bai htu yang gaw gumhpraw tawng rawng. Gumra hkan nu ni htu ai shara kaw gaw ja tawng bai rawng, bainam hkan nu ni nga ai shara kaw bai htu yu yang gaw gumhpraw tawng rawng rai na jahkrai ma gaw dai ni hte grai pyaw hkra nga na num mung la rai na ngwi ngwi pyaw pyaw hte dinghku de sha mat wa sai da. Dai shi nga rem ai shaloi shat jaw sha kaba da ai shu gaw shu majing nrai, sagya shu she rai nga ai.

Sources