Details

Latitude

25.234

Longitude

96.9165

Start Date

2019-02-05

End Date

2019-02-05

Transcription (La Ring) Num tsawm ra ai la langai a lam. Moi la langai mi gaw madu jan gaw manya abam re ai da. Shan yan gaw kasha langai mi lu sai da. E dai gaw moi gaw anhte Wunpawng amyu ni gaw "Mayu ntsawm ai gaw dama a, dama ntsawm ai gaw mayu na" nga nna tsun chye nga ga ai. Dan rai mayu kasha ntsawm manya raitim dama ni nla nlawt hku na dama lashing ni hpe e shanaw ya ai. E dama kasha shabrang kasha ni anyi anya ntsawm nkawm raitim mayu kasha ni kade zen kade tsawm tim nwa nlawt "Um anhte dama lashing" re nga na "Wa u sa u" nga na e wa shangun ya sha re ai ni prat ni nga lai wa sai. Dai prat na rai ang jaw ai dai la dai gaw. Shi gaw loimi rai dum na hku rai nga shaloi she madu jan gaw e anyi angaw angawk angak, angawk ai manya nga tim mala la manya mung gaw nre raitim mung e shan yan gaw ma langai lu sai da. Shaloi gaw lani mi na nhtoi gaw madu jan gaw gat sa wa ai da. Gat sa wa jang gaw dai madu la wa gaw ama hta ba la na she le gat lam de sa wa na dai lam kaw gaw mahkrai nga ai da. Mahkrai nga na she kasha hpe gaw mahkrai ntsa lam ntsa kaw shadun kau tawn da nna shi gaw mahkrai npu kaw makoi madat nga ai da. Dai shi myit hta gaw "E anum masha ni num tsawm ai ni lai wa jang dai ma dai kadai e mi rai rai e Nu nga na hkap shaga ai num dai hpe gaw shi ra la na" hku na shi myit hta gaw dai hku rawng da ai da. "Kadai e mi rai rai kasha wa e Nu nga na hkap shaga ai dai wa hpe shi gaw la na" ngu na shi myit hta dai hku nan nan rawng da na she kasha hpe lakang mahkrai ntsa kaw shadun da ai da. Shadun da na shi gaw mahkrai pawt npu kaw madat dung taw nga ai da. Shaloi she e gat sa wa ai ni gaw hpung kade lai mat wa, hpung kade lai mat wa tim mung e kasha wa gaw e Nu nnga hkraw ai da. Nnga na she hpang jahtum kaw gaw kanu gaw ngawk ngawk san na she e lit gun nna e lu sha sha hpa gun nna she hpang jahtum kaw e shi madu jan wa ai da. Wa jang she dai kasha gaw madu jan wa jang she le mu nmu re kaw na she "E nu e nu anu wa ra ai, anu wa ra ai" nga na kasha hkap kabu la ai da. Dai mi shawng e madu jan nre ai kanu nre ai num ni kade tsawm ai kade hkrak ai ni kade lai tim shi kaw du wa nga tim e nu e nu nga na nhkap kabu nhkap shaga ai da. Dai shi kanu gaw le mu nmu re kaw na gaw "Anu wa ra ai anu wa ra ai" nga na hkap kabu la ai da. Dai kaw na la dai wa gaw "Aw aw ntsawm tim manya tim kaning re raitim mung e nye madu jan gaw she rai nga a hka, ma ndai masha ni kade tsawm ai lai tim nu mung nnga, e kaning re tim madu kanu gaw kanu rai nga hka. Ma mung ndan re kaning re ai manya hpe raitim mung e madu kanu re gaw chye nga hka" ngu na dai shani kaw na gaw shi myit malai nna dai shi na madu jan manya angawk raitim mung e prat tup nga gumgai dingla jahtum kau ai da.

Sources