Details

Latitude

25.234

Longitude

96.9165

Start Date

2019-02-05

End Date

2019-02-05

Transcription (La Ring) Muslim la wa hte e Jinghpaw la wa a maumwi kadun rai na re. E moi Muslim la wa hte Jinghpaw la wa gaw shan rau nga hkawm sam nga shaloi gaw Muslim la wa a makam gaw shingtawn pan re ai da. Shingtawn pan rai rai jang gaw, shingtawn pan ngu gaw anhte Jinghpaw ni gaw simai she shatai ai, si ntsin nai ntsin hkan bang sha, jap mawng ni mawng sha, nawhpu ni hte jap htu ni htu sha re e shingtawn pan shat mai hpe she um Muslim la wa gaw shi a Karai Kasang makam shatai nna naw ai da. Jahpawt.. shagu shingtawn pan kaw sa naw jahpawt shagu shingtawn pan kaw sa naw re gaw Jinghpaw la wa mu, mu jang gaw "Koi.. la wo ra wa gaw shingtawn pan e wa Karai Kasang shatai nna sa naw ai gaw" ngu na she shi myit hta e shi hpe e loimi jahpoi mayu ai hku she nmyit rawng ai dawng shaloi jang she shi gaw lahpawt mi na gaw shi sa naw ngut ai hpang e shi mu nga yang dai shi na shingtawn pan dai hpe sa mayut la nna jap mawng mawng sha kau ya ai da. Jap mawng mawng sha kau ya jang gaw dai gala la dai wa gaw pawt, shi myit hta e "Mana manang wa a Karai Kasang madu kam ngai kam sham nga ai rai hpe wa la wo ra wa gaw dan di wa jap mawng amawng sha kau ya ai gaw" ngu na shi myit kata kaw grai pawt mayu ai da. Pawt mayu.. nna she e "Ngai mung shi a makam e naw di kau ya na, ngai shi hpa kam sham nga kun naw yu yu na ngu na she naw lagu yu na lang nang e gaw" ngu na shi myit hta dai hku rawng da ai da. Shaloi jang gaw Jinghpaw la wa mung "Ya ngai shi hpe di sai re majaw shi mung ngai e di na ra ai" ngu nna Jinghpaw la wa mung shi dai hku na shi myit hta dai hku dum la ai da. Shaloi jang gaw dai wa gaw "E nye makam gaw ndai wa re ngu na hku" ngu na she samat hpe she jahpawt shagu shi gaw samat hpe sa naw masu su re da. Shi gaw hkrak nga yang gaw samat naw ai wa gaw nrai nga anhte Jinghpaw ni gaw samat gaw hpa e mung nnaw hpa e mung nnaw ai amyu gaw rai nga raitim shi gaw gala Muslim la wa hpe ashe majaw shi mung wo ra wa e sa masu galaw masu naw masu dan ai hku rai nga. Dai samat pawt kaw jahpawt shanang sa naw sa naw rai yang she shi gaw hkan lagu yu ai da. Wo Jinghpaw la wa kade sa wa yang kade hkan lagu yu hkan lagu yu rai yang she samat pawt kaw she sa naw dagrawng nga nga re sa mu la sai da. Saloi jang gaw "Nang e na gaw na Karai mung ngai mu sai ya gaw" ngu she shani mi re shana mi re gaw nchye ai shi gaw hkyi nyi mayu jang she dai Jinghpaw la wa sa naw ai samat pawt kaw sa nyi nna she dai shi naw ai samat lap dai di la nna she maidang hkyi kasut ai da. Hkyi kasut jang gaw hkyi kasut dat jang she wat.. um maidang kaw gaw kawa kasheng machyi na she "Kwi.... Jinghpaw ni a Karai Kasang gaw ndan ngan re kawa ai re rai nga hka" ngu na she dai kaw na kajawng kahtan na wa mat ai da. Maumwi gaw ndai kaw ngut sai.

Sources