Details

Latitude

25.234

Longitude

96.9165

Start Date

2019-02-03

End Date

2019-02-03

Transcription (La Ring) Maumwi gabaw gaw sharaw langai mi hte mahkawn hkan wa ngu ai re. Moi shawng de da mare kaw ndai hpun hta hta sha ai gaida hkan wa mahkawn tsawm langai lu ai gaida hkan wa nga ma ai da. Dai shaloi shan wa gaw shani shagu nam de hpun hta sa ai da. Lani mi na aten hta shalawng langai mi de du mat wa ai shaloi ndai sharaw langai mi na shara de du mat wa ai da. Dai shaloi sharaw gaw dai mahkawn kasha hpe mu ai hte shi gaw gai yu ra mat na she dai hpe she tsun ai da. "Nan wa ndai kaw hpabaw sa galaw rai" ngu tsun dat ai shaloi hkan wa gaw "Hpun sa hta ai ngu" tsun "Ndai nye shara re majaw hpun nhta lu ai" ngu tsun ai da. "E nan hkawng hpe sha kau na" ngu tsun ai da. Dai shaloi "Grai tawngban ai i e an wa hpe hkum sha, an wa hkrai sha nga ai an wa hkrai sha re an wa hkawng hkrai nhka lu ai" ngu na tsun ai da. Dai shaloi um sharaw gaw "Dan nga jang nang na mahkawn kasha hpe ngai hpe jaw rit" ngu tsun ai dai shaloi um jahkring mi na bawnu a majaw kawa gaw "E mai ai" ngu tsun kau dat ai da. Shaloi sharaw wa gaw grai na ra mat na me she shi gaw grai kabu ai da. Raitim mung "Hpyi shawn mayu ai lam ni nga ai" ngu tsun ai da. "Hpa rai ta" ngu tsun ai da dai shaloi e ndai kawa wa gaw "Nye kasha gaw da nang e wa kawng tu ai i wa masen tu ai dai hpe hkrit ai" ngu tsun ai da. "Dai hpe la kau ai rai yang gaw nye kasha nang kaw kam wa sai" ngu tsun ai da. Dai shaloi sharaw wa mung num mahkawn hpe sha ra ai majaw shi kaw tu ai wa yawng hpe e daw ret daw kau ai da. Shaloi wa nlu mat sai da. Hpang jahtum naw tsun ai da "Nang kaw nang na lamyin ni grai galu ai da, ndai nang lamyin ni naw tu ai rai yang gaw nye kasha nkam wa ai" ngu tsun ai da. Dai shaloi "E dan nga jang ngai lamyin daw kau na" ngu na she shi na masen la ai lamyin ni hpe daw kau ai da. Hpang jahtum sharaw gaw wa ma ntu mat sai da, lamyin ma ntu mat sai shi kaw galaw na hpa atsam ni nnga mat sai da. Dai shaloi dingla wa gaw "Rai sai" ngu na she tsun ai da ya gaw nye kasha hpe mai la sai" ngu na tsun ai da. Dai shaloi shi kasha hpe jaw masu su di na me she hpang jahtum e ndai sharaw wa hpe sat kau ai da. Sharaw wa gaw matsan mayan rai na me she nnga mat ai da.

Sources