Details

Latitude

25.234

Longitude

96.9165

Start Date

2019-02-03

End Date

2019-02-03

Transcription (La Ring) Ndai maumwi na gabaw gaw sharaw ni hpa rai na teng pang teng pang ahkyit ahkat san ai e byin mat ai ngu ai maumwi re ai. Moi shawng de da nam maling langai kaw sharaw ma nga ai da. Dai kaw gaw nyau ma nga ai da. Nyau gaw chye hte maren hpun mung grai lung byin ai le i dai yu mung grai chye sat ai rai nga. Rai yang gaw shi gaw da grai zen ai re majaw shan mung jahkring hkring lu sha ai da. Raitim da hkum sha kaba di bawnu kata re ai sharaw gaw da hpa mung nlu sha ai da. Dai na lasi gyawm gyawm grai kaw si na nga ai da. Raitim wa shan jahkring hkring lu tam sha dai hku jaugawng lu gawng sha ai nyau hpe wa shi gaw manawn na hku nga. "Ndai kachyi sha law ai wa grai byin na ngai gaw hparai nbyin ai kun raitim shi ndai hku kachyi sha law ai wa hpabaw rai na byin ai kun shi kaw ngai naw nchyang naw sa chyang di shi kaw na sharin la na re. Raitim ngai grai byin mat wa ai hpang gaw shi hpe sat kau na re" ngu di shi wa myit ai da. Dai re majaw lani mi na aten hta gaw nyau kaw shi gaw nchyang sa chyang dai hku myen hku tsun ga nga jang ta-be wa hkan ai le i. Dai hku rai na matu shi kaw sa wa ai da. Dai hte maren nyau wa hpe tsun ai da "E hkau nyau e ngai gaw nang kaw nchyang chyang na, na na jaugawng gawng ai hpaji ladat ni sharin la mayu ai le. Rai ngut jang shan ni hpa ni jaugawng gawng sha mayu ai le" ngu di tsun ai da. Dai shaloi nyau wa mung "Mai ai mai ai le ngai sharin ya na le" ngu di tsun ai da. Raitim grai zen hpyau ai nyau wa gaw shi na myit kaw shi lagu myit da ai da. "Ya ngai na hpaji ni yawng sharin jaw kau yang shi gaw ngai hpe lani mi bai sat na rai nga ai. Shi gaw hkum mung grai kaba ai lamyin mung ngai hta grau galu ai dai hte maren kawng mung ngai hta grau masen ai, re majaw ngai gaw lama mi gaw makoi da na re. Yawng gaw sharin ya masu su tim langai mi gaw makoi da na re" ngu di shi gaw myit ai da. Dai hte maren shi hpe hpun lung mung sharin ya sai da. Dai hte maren jaugawng gawng ni (ladat) ni mung grai langai hpang langai sharin ya ai da. Dai re ai majaw dai nyau hpaji rawng ai wa kaw na sharin la ai dai sharaw wa gaw da grai kung wa na hpa mung hpa grai lu sat sha wa sai da. Dai di dai hku lu sat sha wa ai sharaw wa gaw da le hte le dai nyau wa hpe mung n-gawn nsawng di wa ai da. Dan ngu jang ga mung nmadat wa sai da. Dai wa lani mi gaw da dai hku shan, shan gyam sha na ngu di shan hkawng bawng nga ninglen dai hku kahproi kanoi rai na shan hkawng wa nmyit mada ai sha wa galaw hkat wa ai da. Dai shaloi gaw da n-gun mung grai ja dum, lamyin mung grau galu dum kawng mung grau masen dum ai sharaw gaw da nyau hpe shachyut hpang wa sai da. Dai re majaw nyau mung ma ja hkrit di she htaw hpun ntsa de hprawng hkrai hprawng hprawng hkrai hprawng rai mat wa ai da. Dai shaloi gaw da dep wa hkyen sai re majaw sharaw wa mung da nyau hpe dai hku gum htawn di amya dat na ngu na hkyen ai da. Dai shaloi hpabaw re rai nga yang gaw nyau wa gaw da sharaw wa hpe brake uk ni (brake kabye lang ai ladat) nsharin da ya na hku rai nga. Dai wa gum htawn hkyen masu su tim dai hku hkring mat ai baw ladat nsharin da ya ai da. Dai re majaw htawra wa gaw gum htawn dat ai shaloi brake uk ni (brake kabye lang ladat) nsharin da ya re majaw wa nre hkaraw de nyau hpe sa gum htawn kamu sha sana ngu di gum htawn dat ai wa hkaraw de hkrat di swi rai di hkrat di si mat ai da. Dai shani kaw na aw nsi ai dai hkaraw de hkrat mat wa ai da. Dai shani kaw na hkaraw kaw na bai pru wa ai shaloi gaw hkum ting mazut mazat ateng apang ahkret ahkrat rai di grai ntsawm mat sai da. Dai kaw na ya daini ten du hkra nyau ni hpe sharaw ni mu yang grai mahkyit mayu grai shachyut mayu re ai da.

Sources