Details

Latitude

25.234

Longitude

96.9165

Start Date

2019-01-28

End Date

2019-01-28

Transcription (La Ring) Ndai maumwi gaw moi.. adwi i kaji ai kaw na anu ngai hpe yup na hkyeng jang dai maumwi shani shagu hkai ya ai re majaw ya du hkra matsing ai hpa le i. Dai la law ma hte e, la law ma marai dai ma tang du hkra re ai da. La chyu chyu law ai majaw la law ai hte kadwi hte e kashu nga ai da i. Kashu hte nga jang wa da i shan dwi gaw da grai matsan mayan rai na nta ma nyawp nyawp rai mare jahtum kaw sha nga ai da. Rai yang she lani mi gaw le.. dai la law ma ni gaw "E.. jahkrai ma e u hkam sa ga" ngu tsun ai da. Shani shagu dai hku tsun jang shi gaw kadwi na hka ni ja ya ra majaw hpang hkrat hpang hkrat re ai da. Rai na la law ma ni gaw shanhte gaw la law ai majaw gaw i jau jau sa di na koi shara shagu nam de e u ni dai hku u hkam hkam da ai da. E rai jang jahkrai ma gaw kadwi na hpun ni gun hka ni ja dai ni bungli ni ngut jang she shi gaw hpang jahtum she i dai hku u hkam sa ai da. E hkam na nga jang wa hkam na shara mung nlu ai da, hpang jahtum gaw hpun kaba.. "E ndai kaw lu tim lu u ga nlu tim nlu u ga" ngu na dai kaw sha u hkama hkam da ai da. Rai di na wa sai da, wa.. wa mat yang hpang de bai la law ma ni gaw "E jahkrai ma e u hkam sa yu ga lo" nga dai jang ma shi gaw jau jau nlu sa ai da. Kadwi hte bungli ni karum dai karum ngut jang she shi gaw hpang de she hkan na sa jang gaw, koi jahkrai ma hkam ai shara kaw gaw chyahkyi kaba langai noi ai da. Dai kaw lu ai da. Bai nna dai la law ma ni hkam ai u hkam kaw gaw wo ra le.. u gaw le u gaw hkawng rang dai sha noi ai da. Dai hpe e la law ma ni shanhte gaw law ai majaw gaw jau jau sa di na dai chyahkyi hpe wa shanhte gaw kahpu kanau law ai majaw htaw.. hpun ndung hte sumri hte gyit noi tawn da na dai la law ma na u hkam kaw gaw dai u gaw hkawng rang dai sha noi tawn da ai da. Rai jang gaw jahkrai ma gaw hpang jahtum she sa yu jang gaw "E dai hku re lo" ngu na "E ndai gaw ngai na chyahkyi gaw ntsa kaw noi ai baw nre lo, nang ga kaw she hkawm ai baw re lo, dai gaw htaw ntsa kaw she pyen ai dai u gaw hkawng rang gaw ga i.. ga u hkam kaw gaw lu ai baw nre" ngu tim shanhte gaw koi la law ni gaw shi hpe i grai pawt wa sai lo "Anhte lu ai majaw she re gaw e" ngu na sha tsun tsun taw ai da. Dai majaw lani mi sha shanhte gaw dum nta de wa nna kadwi hpe "Adwi e ngai na u hkam kaw gaw u gaw hkawng rang she noi ai, dai na la law ma ni na u hkam kaw gaw dai chyahkyi she noi taw ai" ngu tsun ai da. "E nga la law ma ni gaw nanhte myit npyaw ai rai jang gaw salang saw ga" nga ai da. Shaloi gaw salang ni shaga agyi ni shaga di nna shanhte ni dai hku hparan ai da. Rai jang dai la law ma ni gaw i shanhte gaw koi salang kaba kaba grai ga ma chye tsun ai ni hpe shaga tawn da ai da. Bai nna dai shan dwi hte jahkrai ma gaw da le.. marai masum kaw na dingla nyeng sha bap bap myi ma atsawm nmu ai da dai dingla hpe sha shaga la lu ai da. Shanhte ni gaw ba ai ngu na shanhte ni kamung jahta taw ai da. Dai hku tsun tsun rai jang gaw "Koi dai hku shanhte sha nyeng shanhte sha dang na zawn zawn" nga ai da. Dai jahkrai ma saw ai e shaga da ai salang gaw da yup nga ai da law. Yup nga ai majaw dai la law ma ni gaw "Ha ha shi shaga ai salang gaw yup she nga ai" nga shaloi dai salang wa gara hku tsun ai i nga jang, "E lamu ntsa de wo hkam de nga shapyin ni lung wa sai, nga shapyin ni lung wa sai" nga yang "Ha ha" nga mani dan ma ai da. La law ma ni gaw "Ha ha gara hku nga ni gaw ntsa de lung ai i ha ha" nga ai da. "E.. ya ndai gaw jahkrai ma na.. e nanhte ni nga lung ai hpe mani ai re i, ndai chyahkyi gaw lamu de nga ai baw nre, ga kaw hkawm ai re, dai jahkrai ma gaw chyahkyi dai jahkrai ma lu ai gaw chyahkyi re, bai na dai i la law ma ni lu ai gaw htaw.. ntsa de pyen ai baw re, dai majaw ntsa de she noi ra ai" ngu na bai i la law ma ni gaw sum nna jahkrai ma yan shan dwi she dang ai da. Ngut sai.

Sources