Details

Latitude

25.234

Longitude

96.9165

Start Date

2017-04-12

End Date

2017-04-12

Masu chye ai num kasha a lam tsun na re. Moi shawng e da hkawhkam wang langai kaw myi man kyip kyip rai na machyip marut rai na grai ntsawm ai num nga ai da. Grai masu sha ai da, dai wa gaw grai chye masu sha ai dai hpe she hkawhkam wa na kau ai da. Rai na hkawhkam wa shaga sai da. Shaga rai shaloi she, nang grai chye masu ai i, gara hku masu ai hpa law nya law ngu dai hku tsun na, kaja ngai grai chye masu ai ngu tsun ai da. Dai hku hkam la ai da, dai shaloi she hkawhkam wa gaw nang na ram chye masu ai gaw ngu na hkawhkam wang kaw gawt kau ai da, shi hpe mare de nmai nga na hku nam de sha nga na hku gawt kau ai da. Dai shaloi she, lani mi na ten hta shi dai hku dam hkawm mat wa shaloi she nam maling langai mi lai ai hpang she ding gai yan dingla hkau na galaw sha na nga ai dinggai yan dingla kaw sa mu ai da. Dai shaloi dingla wa gaw dai hku hpun ni ga dut rai na gumhpraw grai lu ai da dai hpe mu na she dinggai jan gumhpraw hti taw ai da, dai hpe grai masu ai num dai wa mu ai da, mu na she tsun sai da. E dwi e ngai dai na ndai kaw ngai hpe shat jaw sha yup shangun rit ngai jinghku jingyu ma nlu ai ngai hkrai sha re dai majaw ngai hpe ndai kaw nga shangun rit ngu tsun na dinggai jan mung matsan dum ai da. Mai ai nga rit ndai kaw tinang galaw tinang sha na nga ga ngu dai hku ngu tsun ai da. Dingla wa shana de wa shaloi ma myit hkrum na she woi nga sai da, hpang shani shaloi she dinggai jan hpe she, dinggai jan gaw dai dingla wa hpe shi shat sa sa rai hku nga, rai yang lani mi na ten hta dinggai jan shat sa sa shangun rai shaloi she shat (jek) lang mat wa ai da. Dai shat bang ai lang mat wa na she dai shi sa sa re kaw hka htung dingsa langai nga ai da. Dai hka htung dingsa kaw shat bang da ai shat majaw dai hpe sa tawn da na dinggai hpang de bai wa mat ai da. E dwi e dwi la gaw oh anhte sa sa re kaw hka htung langai nga ai dai kaw kashawt na, shi hte ngai wa hkrum ai ngai shat (jek) jaw dat ai wa shi kashawt na hka htung de hkawn bang mat wa sai dai majaw adwi nang sumri galu langai lang na lawan hkan kagat nang u ngu tsun u da. Ngai hte lawan sa wa ga ngu sa ai shaloi dinggai jan gaw hka htung kaw du ai shaloi nye madu wa ngai hpe tawn kau da sai ngu grai hkrap na she ning hku sa chyan yu dat ai hte dai grai masu ai wa htu kanawng bang kau da ai da. Htu kanawng bang ai shaloi dinggai dai hkye la rit lo ngu pyi nlu marawn ai hka htung kaw hkawn si mat ai da. Dai hpe she dai dingla wa gaw e dai ni gaw shat ya mung nsa sa ai gaw ngu na she nhtu lang na wa shaloi she dai dinggai jan hpe grai masu ai num wa htu kanawng bang kau dat ai mu ai da. Dai shaloi she shi na myit hta sha gaw i an yan la bau mung bau, bau tawn da ai hpe pyi chyeju nchye dum na nye madu jan hpe du hkra sat ai gaw dai majaw shi hpe ma sat ra sai ngu na dai num wa hpe shi lang wa ai nhtu hte kahtam sat kau ai da.

Sources