Details

Latitude

25.234

Longitude

96.9165

Start Date

2017-03-09

End Date

2017-03-09

Moi shawng e da grai maji ai lauban wa nga ai da. Dai lauban wa gaw da kasha 3 nga ai da, kasha 3 nga she shi gaw da i dan re shi kasha ni hpe sutgan ni garan jaw yang mai na i nga myit ai da. Shi gaw grai maji ai da i. Sa ai masha ni hpe ma shi gaw lauban tim da grai lauban tim masha ni hpe majoi joi hpa mung n jaw ai da. Majoi joi hpa mung n jaw na dai hku nga ai shaloi she shi kasha ni hpe tsun ai da. Magam manaw mala shanhte 3 hpe shaga la na magam hpe tsun ai da, magam na nang i ya si ai shaloi da. A wa si ai shaloi da nang da i n hpa di na ngu tsun she. Ngai gaw da a wa si ai shaloi da i poi ni ma kaba law hkra dan re galaw ya na. Re na she mang hpe ma a tsawm sha makoi mayang na dai hku tsun she, um re sai, nang tsun ai mung nau n jaw shi ai ngu dai hku tsun na manaw hpe bai san. Manaw wa gaw tsun ai da, dai hku tsun magam tsun ai hku tsun re shaloi she mala wa hpe san she mala gaw myit ai da. Nye wa gaw da i nye nu yen tsun ai dai ram teng nga tim ndai ram lauban ai mi dai hku galaw yang she htuk ra re wa mi she nye wa gaw hpa na dai ga n ra sharawng ai i ngu na shi myit ai da. Dai she shi gaw shi wa grai maji ai re chye ai dum dat sai da. Nye wa gaw grai maji ai re majaw ngai gaw nye wa hpe i nye wa hpe ga a myu mi hku na tsun yang she hkrak na re ngu na shi gaw ning hku ngu na she a wa nang si ai shaloi le i ngai gaw da a wa nang hpe i nang si ai hte nang na shan hpe tawk di na dumsu shan re ngu na mare masha ni yawng hpe dut shabra hkawm na da. Dai shara magup dut hkawm di na i mare ni yawng hpe dut shabra ngut na gumhpraw lu ai hte nye hpaga rai ni bai mari la na, lauban byin hkra bai galaw na ngu tsun ai da. Dai she nang na ga hkrak ai ngu na she shi na sutgan ni yawng hpe jaw na shi hpe dai hku sha nga na shi si mat re shaloi she da shan nau ni 3 gaw da dan re a tsawm sha makoi mayang kau ai da.

Sources