Details

Latitude

25.234

Longitude

96.9165

Start Date

2017-02-09

End Date

2017-02-09

Transcription (Lu Hkawng) Ya ngai hkai na maumwi gaw moi she la kasha La Ran ngu ai shan la nga ai da. Dai shan la gaw grai matsan ai da. Matsan tim mung shan la gaw lahkawng yan myit mung grai kaja ai da. Shan lahkawng shan lahkawng nau matsan nna shana mung shana bungli galaw ai da. N yup n sha galaw ai da. Dan re na she shan lahkawng gaw gum hpan sara langai kaw sa ma ai da. Sa nna she ''E sara e an lahkawng gaw grai matsan ai majaw gara hku kaning di na kun ngu na sara nang hpe sa san jahkrup ngu na sa ga ai law'' ngu ai da. Rai jang dai dingla wa gaw gum hpan wa gaw ''E nan lahkawng sanit ning na ai tsa yam nga ai i'' ngu yang ''E lu ga ai'' ngu ''Sanit ning yaw da ai Ula n lu ai i'' ngu yang ''Lu ga ai law lu ga ai'' ngu shan lahkawng gaw matsan ai majaw n lu ai, dai tsa yam ni Ula ni n lu ai rai tim shan a n-gup aga hte lu ai law lu ai law ngu na tsun ai da. Bai nna shan lahkawng hpe ''Ya nan a nta kaw manam shang wa na ra ai, ya nan a nta kaw manam shang wa jang dai sanit ning sat da ai Ula sat jaw mu, sanit ning dun da ai tsa yam jahkrat jaw mu'' ngu na tsun dat ai da. Dai dingla wa gaw dan ngu tsun dat yang she shan lahkawng kaw kaja wa hpang shana gaw shat ni mung shadu da, dai tsa yam ni mung tsing da Ula ni mung sat shadu da rai, manam shang wa sai da. Manam shang wa nna dai shana manam ni pyaw pyaw ngawn ngawn shan kaw wa lu wa yup rai ma ai da. Hpang jahpawt gaw dai shan kaw shang wa ai hpaga la ni gaw hpang jahpawt jau jau bai rawt mat wa sai da. Rawt mat wa ai hte shan la mung ya manam ni naw yup nga ai kun ngu rai yang gaw wa yu yu yang gaw manam ni gaw n nga sai da. Hpun nba ni hpe wa gun yu yang gaw ja tawng hkrai hkrai gumhpraw ni mung tawn da ya ja tawng ni mung tawn da ya nna shan gaw grai mau mat ai hte gahpra ai hte kabu ai hte re na shan dai wa hta la re nban de bai pru wa yu yang mung ndaw ting npu ting Nga, Dumsu hkrai Gumra ni dun she dun da ya, tun she tun da ya re nna, shan lahkawng gaw kabu ai sha n-ga mau mat wa nna, rai ai da. Dai shan lahkawng gaw hpa majaw i dan re ai nga yang oh ra gum hpan sara wa e, dingla wa e shan hpe sanit ning na ai tsa yam n lu ai i nga yang lu ai nga sanit ning yaw da ai Ula n lu ai i nga yang lu ai nga majaw shan lahkawng gaw hkam hkaw kaja ai shan a n-gup aga hte lu na lam hpe n lu tim lu na hku tsun la ai majaw shan gaw myit mung kaja ai majaw Karai Kasang hpan ya ai majaw dai hku na lusut lusu nga mu nga mai na grai pyaw na nga mat wa ai da. Matsan mayen re ai ni hpe mung shan lahkawng bai jaw lu jaw sha jaw bu jaw hpun nna nga mat ma ai nga nna ndai maumwi hpe nanhte ma ni mung galoi mung matut nna hkai mu matut nna ndai maumwi hpe katsi la nna nanhte ma ni grau nna chye tsun chye hkai sa wa na matut ya ngai n-woi dwi hkai dan nga ai ga rai nga ai law ma ni e, maumwi mausa ngu ai gaw moi ji woi ji wa kaw na hkai hkrat wa ai maumwi mausa ni re ai majaw kaja ai hku na myit kaja ai hku na hkai sa wa ai katsi la mai ai hku nanhte galaw sa wa ra ai ngu na ndai hte hkai dan ai hku rai sai.

Sources